Aasiaat qaasuitsup killeqarfiata avannaani ippoq, qeqertami 10 km²-isut angitigisumi Qeqertarsuup Tunuanut pulammagiaani kujallermi. Kaperlattarpoq decembarip aallaqqaataaniit januaarip 12-ata tungaanut seqinerlu kaaviinnartarluni majip 27-aniit juulip 18-iata tungaanut. Aasiaat illoqarfiuvoq nutaanik malinnaasoq ilinniarfeqarluni napparsimaveqarlunilu kiisalu angallannikkut pitsaasunik attaveqarluni. Nutaaliamik aalisakkanik suliffissuaqarpoq, amutsiveqarluni uuliasiornermilu misiligutaasunik qillerinermi maanna ingerlanneqartuni umiarsualivittut aallaavigineqarluni.

Aasiaat niuertoqarfittut 1759-imi Egedesminde-mik taallugu Hans Egedep erneranit Niels Rasch Egedemit ataatani eqqaaniarlugu Nassuttuup avannaani 

Eqalussuit qinnguanni tunngavilerneqarpoq. Pukkitsormiut arfanniarnerata aamma nunap inuinik niueqateqarnerisa taamaatitinnissaat niuertoqarfiup tunngavilerneranut peqqutaapput. 1763-imi niuertoqarfiup qeqertamut Aasiannut maanna inigisaanut nuunnissaa aalajangerneqarpoq taamalu niuertoqarfik avannaani Qasigiannguit kujataanilu Sisimiut akornanni qitiunerusumik inissisimalerluni.

Aasiaat sorsunnersuaq kingulleq sioqqulluguli ilinniarfeqarfittut aamma avannaanut umiarsualivittut ingerlateqqitassaasivittut malunnarsereersimavoq. Sorsunnersuup nalaani amerikkarmiut silasiorfimmik pilersitsisimapput Bluie West – 5-mik taallugu. 1950-imi nunasiaajunnaarnerup pilernerani illoqarfik kommuninngorpoq angisooq amerlasuunik nunaqarfittalik. 2009-mi Aasiaat avannaani kommunit 7 allat peqatigalugit ataatsimut kattunneqarput kommunerujussuanngorluni ataaseq – Qaasuitsup Kommunia